Fylkestinget

Nord-Trøndelag fylkeskommune

SAKSPROTOKOLL

Interpellasjon nr. 10/4

Mildred Marita Ramberg Røthe (V): Naturmangfaldåret 2010

Behandlet/Behandles av	Møtedato	Int. nr .
Fylkestinget	17.2.2010	10/4

Saksbehandler:	Geir Rannem
Arkivsak:	10/00735
Arkivkode:	741

Naturmangfaldåret 2010

Jordkloden har eit enormt mangfald av levande vesen, det fins truleg over ti millionar artar. Berre litt under to millionar er vitenskapleg skildra. Mens forskarane kvar dag oppdagar nye artar, blir enno fleire utrydda for godt.

Vi reknar med at det fins 60.000 artar i Noreg, men det er berre rundt 20.000 vi veit noko om.

FN har valt 2010 som Det Internasjonale Naturmangfaldåret. Hovudbodskapen i Naturmangfaldåret er at artsmangfaldet går tapt i eit svært høgt tempo. Det hastar med å gjere noko for å stoppe denne utviklinga. Vi er avhengige av tenestene naturen gir oss, og, sjølvsagt, det handlar om eit moralsk ansvar. Naturmangfaldet er verdifullt, vi har ikkje råd til å miste meir av det.

I år, 2010, skal målsettingane fornyast og innsatsen aukast.

Spørsmål til fylkesråd for miljø:

Korleis kan fylkesrådet bidra for å markere Naturmangfaldåret 2010?

Fylkestingets behandling i plenum

Marita Ramberg Røthe la fram interpellasjonen.

Fylkesråd for miljø, Johannes Sandstad, svarte slik:

FN har valt 2010 som Det Internasjonale Naturmangfaldåret. Miljøverndepartementet (MD) har hovudansvaret for Naturmangfaldåret. Direktoratet for naturforvaltning (DN) bidreg praktisk til gjennomføringa.

I markeringsåret blir det lagt stor vekt på samarbeid for å stoppe tapet av naturmangfald.

Naturmangfald har fått auka fokus i forvaltninga dei siste åra, og vi fekk ny Naturmangfaldlov i 2009. Lova gir grunnlag for auka ambisjonar for vern og større omsyn til naturmangfaldet både i samfunnsplanlegginga og i utbyggingssaker. Det er Fylkesmannen som har det regionale hovudansvaret for forvaltninga av dette lovverket. Utbyggarar, kommunar og fylkeskommunar skal sjølvsagt òg legge til grunn og ta omsyn til naturmangfaldet i sine planar.

Fylkeskommunen er frå 01.01.2010 gitt auka forvaltningsansvar på fleire område innan natur- og miljøområdet. Dette omfattar mellom anna friluftsliv, jaktbart vilt, ikkje trua innlandsfisk, vassforvaltning, akvakultur, og klimatiltak. Vi vil i større grad ta med vurderingar av naturmangfaldet i våre eigne planar og strategiarbeid framover.

I denne samanhengen er det naturleg å nemna dei utfordringane vi står overfor når det gjeld villaksen i dei nordtrønderske lakseelvane. Fylkeskommunen har bidratt til opprettelsen av kunnskapssenteret for laks og vannmiljø, og har allereie lagt opp til eit møte med senteret der der dette temaet er en hovudsak.

Fylkeskommunen har ikkje hatt nokon tradisjon for å markere dei ulike ”miljøåra” i eigen regi. Vårt engasjement på dette området er kanalisert til frivillige ”paraplyorganisasjonar”, gjennom økonomisk stønad. Som eksempel kan nemnast:

· Det nasjonale ”Friluftslivets år 2005” vart markert med ei rekke tilstellingar i regi av Forum for natur og friluftsliv/Nord-Trøndelag. Fylkeskommunen bidrog økonomisk til dette, gjennom støtte til Forum for natur og friluftsliv, og tok del i fleire arrangement.

· Det nasjonale ”Kulturminneåret 2009” vart markert med ei rekke tilstellingar og arrangement i Nord-Trøndelag. Fylkeskommunen si avdeling for kunst, kultur og kulturminne bidrog økonomisk med tilskott, med vidare fordeling til prosjekt gjennom Nord-Trøndelag Kulturvernråd. Kommunar og organisasjonar stod for dei ulike arrangementa.

Fylkeskommunen er ikkje kjent med at det er teke initiativ frå sentrale miljømyndigheiter til å involvere regionale etatar i markeringa av naturmangfaldsåret.

Fylkesmannen i Nord-Trøndelag legg opp til fleire fagkonferansar med kommunar og organisasjonar denne våren. Dette både som opplæring i den nye Naturmangfaldlova, samt ei sterkare bevisstgjering innan dette fagområdet i plansamanheng. Dette kan òg sjåast som fylkesmannen si synleggjering og markering av Naturmangfaldåret 2010, og som ein del av fylkesmannen sitt arbeid på dette området.

Til det konkrete spørsmålet som reises av interpellanten Marita Ramberg Røthe er det derfor å seie at Fylkesrådet vil bidra til auka fokus på naturmangfald i sitt arbeid. Dette vil i hovudsak gjelde for det regionale planarbeidet og forvaltning innan fylkeskommunen sine ansvarsområde. Fylkeskommunen har så langt ikkje lagt opp til nokon markering av Naturmangfaldåret, i eigen regi.

----------

Følgende hadde innlegg:
Marita Ramberg Røthe (V) Trude Holm (Sp), Rune Hegge (SV), fylkesråd Johannes Sandstad.